Ebola virusu yayılan ölkələrin sayı artır

Bakı, 1 noyabr, AZƏRTAC Nigeriyanın şimal-şərqində iki nəfərin Ebola virusuna yoluxduğu ehtimal edilir. AZƏRTAC xarici mediaya istinadla xəbər verir ki, bu barədə ölkənin Xəstəliklərə Nəzarət və Profilaktika Mərkəzi məlumat yayıb. Bildirilib ki, qızdırma qeydə alınan hər iki şəxs təcrid olunublar və onların tibbi göstəriciləri dəqiqləşdirilməklə yanaşı, təmaslarının da izlənməsinə başlanılıb.

Həmin şəxslərdə Ebola virusunun olub-olmaması hələ təsdiqlənməyib, bu, laboratoriya testlərinin nəticələrindən sonra aydınlaşacaq. Qeyd edək ki, oktyabrın 26-da Nigeriyada ilk xəstənin Ebola virusuna yoluxduğu təsdiqlənib. O, isveçrəli olub. Həmin şəxs Uqandadan təyyarə ilə Nigeriyaya gəlibmiş. Bu arada, Konqo Demokratik Respublikasında Ebola virusundan ölənlərin sayı 5000-i keçib.

Ölkənin Milli İctimai Səhiyyə İnstitutunun məlumatına görə, Konqo Demokratik Respublikasında hazırda bu virusa yoluxmuş 10 min 351 nəfər var. Xatırladaq ki, Ebola epidemiyası bu ilin may ayında Konqo Demokratik Respublikasında və Uqandada başlayıb. Konqo Demokratik Respublikasının 8 əyalətində Eboladan yoluxma və ölüm halları aşkarlanıb. Uqanda hakimiyyəti epidemiyanı iyulun 28-də başa vurduğunu elan edib.

Ümumdünya Səhiyyə Təşkilatı bunu avqustun 25-də təsdiqləyib. Keniya hakimiyyəti tərəfindən isə oktyabrın 6-da ölkədə ilk Ebola hadisəsi elan olunub.